Ballade pour prier
Notre Dame



Dame des cieulx, regente terrienne
Emperiere des infernaux paluz 1,
Recevez moy, vostre humble chrestienne,
Que comprinse soye entre vos esleuz,
Ce non obstant qu’oncques rien ne valuz.
Les biens de vous, ma dame et ma maistresse
Sont trop plus grans que ne suis pecheresse,
Sans lesquels biens ame ne peut merir 2
N’avoir les cieulx, je n’en suis jengleresse 3.
En ceste foy je vueil vivre et mourir.

À vostre Filz dictes que je suis sienne ;
De luy soyent mes pechiez aboluz :
Pardonne moy comme a l’Egipcienne 4,
Ou comme il feist au clerc Theophilus 5,
Lequel par vous fut quitte et absoluz,
Combien qu’il eust au diable fait promesse.
Preservez moy, que ne face jamais ce,
Vierge portant, sans rompure encourir,
Le sacrement qu’on celebre a la messe 6
En ceste foy je vueil vivre et mourir.

Femme je suis, povrette et ancienne,
Qui rien ne sçay ; oncques lettre ne leuz ;
Au moustier voy dont suis paroissienne 7
Pâradis painct, où sont harpes et luz 8,
Et ung enfer où damnez sont boulluz :
L’ung me fait paour, l’autre joye et liesse.
La joye avoir fais moy, haulte Deesse,
A qui pecheurs doivent tous recourir,
Comblez de foy, sans faincte ne paresse.
En ceste foy je vueil vivre et mourir.

ENVOI

Vous portastes, digne Vierge, princesse,
Iesus regnant, qui n’a ne fin ne cesse.
Le Tout-Puissant, prenant nostre foiblesse,
Laissa les cieulx et nous vint secourir,
Offrir a mort sa tres chiere jeunesse.
Nostre Seigneur tel est, tel le confesse.
En ceste foy je vueil vivre et mourir.




François VILLON,
Le Grand Testament
de Maître François Villon
, 1461.
(Ballade composée par Villon
à la demande de sa mère.)






(1) Marais.
(2) Mériter.
(3) Je ne plaisante pas avec cela.
(4) Sainte Marie l’Égyptienne, prostituée d'Alexandrie qui se convertit et vécut ensuite dans le désert pendant quarante-sept, jusqu'à sa mort vers 421.
(5) Théophile de Cilicie, apostat et repenti.
(6) Vierge portant, sans « dépucelage », le corps de Jésus-Christ, qu’on célèbre à la messe.
(7) Je vois dans l’église dont je suis paroissienne.
(8) Luths.




 

 

 

 

 

Accueil Index général Narrations Méditations Études
Auteurs Livres Pensées et extraits Thèmes